Mamlaka ya Gambia yatoa maelezo kuhusu mapinduzi yaliyotibuliwa
Mpango huo uliogunduliwa na mamlaka 'unaonyesha muundo wa kundi ambalo lingelishiriki' katika jaribio la mapinduzi pamoja na mpango wake wa kunyakua mamlaka, ikiwa ni pamoja na udhibiti wa vyombo vya habari vya serikali, Jeng amesema hivi punde.
Imechapishwa:
Mamlaka ya Gambia siku ya Alhamisi kwa mara ya kwanza ilitoa maelezo ya jaribio la mapinduzi lililotibuliwa la Desemba 20 huko Banjul, ikisema wahusika wa jaribio hilo walipanga "kuwakamata maafisa wakuu wa serikali na kuwatumia kama mateka kuzuia uingiliaji wowote wa kigeni".
"Pia walikusudia kuwaondoa (kutoka katika majukumu yao) maofisa wote wakuu wa jeshi kutoka vyeo vya meja na zaidi, pamoja na kuunda upya vikosi vya jeshi la Gambia", amebainisha Abubakarr Suleiman Jeng, Mshauri wa Usalama wa Kitaifa, ambaye alisoma taarifa hiyo kwa vyombo vya habari katika Makao Makuu ya Ulinzi huko Banjul siku ya Alhamisi.
Tume ya uchunguzi, inayotarajiwa kuripoti katika muda wa mwezi mmoja, iliundwa nchini Gambia siku ya Jumanne ili kuangazia jaribio hili linalodaiwa kuwa la mapinduzi, ambalo ni la hivi punde zaidi katika Afrika Magharibi tangu 2020, baada ya kufanikiwa kwa mara mbili nchini Mali na Burkina Faso, nyingine nchini Guinea, na jaribio lingine huko Guinea-Bissau. Askari saba walikamatwa kuhusiana na kesi hii.
Aidha, mwanasiasa, aliyekuwa Waziri wa Masuala ya rais chini ya utawala wa Yahya Jammeh (1994 - 2017) na mwanachama wa chama kikuu cha upinzani, United Democratic Party (UDP), pia anazuiliwa baada ya kuonekana kwenye video inayopendekeza kuwa rais atapinduliwa kabla ya uchaguzi ujao wa serikali za mitaa. Chama chake kinadai kuachiliwa kwake mara moja.
"Wakati huo huo, imebainika kuwa wapangaji njama hizo walianzisha mawasiliano, walifanya mikutano ya siri katika baadhi ya maeneo yaliyotambuliwa ndani ya nchi" ili kupanga mapinduzi hayo, aliendelea, akitaja pia ushirikiano wa raia ndani na nje ya nchi.
Hatua ya kushtukiza ya Adama Barrow kushika wadhifa wa urais mnamo mwezi Januari 2017 ilimaliza miongo miwili ya utawala wa kiimla katika nchi hii ndogo, maskini yenye watu milioni mbili.
Bw. Barrow alishinda kwa urahisi muhula wa pili mwezi Desemba 2021, wakati wa uchaguzi wa rais ukiwa ni kipindi cha kwanza cha mpito cha wazi kwa mkuu wa koloni hili la zamani la Uingereza tangu utawala wa kidikteta.