Libya yawafukuza wahamiaji haramu 350 kutoka Misri
Mamlaka ya Libya imewarejesha nchini mwao wahamiaji 350 wa Misri waliokuwa wakiishi kinyume cha sheria nchini Libya Jumatano, kulingana na afisa mmoja.
Imechapishwa:
"Bodi ya Kupambana na Uhamiaji Haramu imeanza mchakato wa kuwarudisha raia 350 wa Misri waliokuwa wakiishi kinyume cha sheria nchini Libya," Kanali Haytham Belgassem Ammar, msemaji wa taasisi hii iliyo chini ya Wizara ya Mambo ya Ndani, ametangaza siku ya Jumatano. "Operesheni nyingine kama hiyo imepangwa katika siku zijazo," Bw. Ammar amesema katika mkutano na waandishi wa habari.
Mnamo 2023, jumla ya "wahamiaji 23,361 wa mataifa ya Kiafrika na Asia, wengi wao kutoka Nigeria" walirudishwa kutoka Libya hadi nchi zao, kulingana na chanzo hiki. Siku ya Jumanne, Wanigeria 323, wengi wao wakiwa wanawake, walirudishwa nchini mwao kutoka viwanja vya ndege vya Tripoli (kaskazini magharibi) na Benghazi (kaskazini mashariki).
Wakati wa operesheni mbili sawa na ile ya Jumatano, Libya iliwarejesha nyumbani Wamisri 600 mnamo Novemba 6 na zaidi ya Wamisri 650 katikati mwa mwezi wa Desemba, wakarudishwa kwenye kituo cha mpaka cha Emsaed na Misri, karibu kilomita 1,400 mashariki mwa Tripoli. Kundi jipya la wahamiaji wa Misri, wanaume wote, ambao baadhi yao bado ni wavulana, pia watarejeshwa kwenye mpaka wa ardhi na nchi yao.
"Nilikuwa naelekea Lampedusa nchini Italia nilipokamatwa," Ziyad Salama Abdellatif, Mmisri mwenye umri wa miaka 16, ameliambia shirika la habari la AFP, ambaye "alitumia saa tisa baharini" kabla ya kuzuiwa kwenye kilele cha jukwaa la 3 la baharini katika eneo la al-Bouri, karibu na Tunisia na takriban kilomita 120 kutoka pwani ya Libya.
Kukosekana kwa utulivu mzuri kwa wasafirishaji
Alirudishwa Zouara, mji wa mpakani ulioko kilomita 120 kutoka Tripoli, alifungwa Zawiya (kilomita 45 magharibi mwa Tripoli), kabla ya kuhamishwa kutoka kituo kimoja hadi kingine "kwa siku 22" . Mwenzake, Bakri Mohamad Sobhi, ambaye "aliingia Libya kinyume cha sheria mwezi Agosti", alisema alikamatwa katika kituo cha ukaguzi cha usalama huko Ras Lanouf, mojawapo ya vituo muhimu vya mafuta nchini humo, na kufungwa jela kwa miezi mitatu.
Wakati Wamisri wengi wanakuja Libya kwa matumaini ya kufika Ulaya kwa njia ya bahari, maelfu ya wengine wanaishi huko kinyume cha sheria kwa miaka kadhaa, wakifanya kazi za kilimo, ujenzi au biashara.
Wafanya magendo na wasafirishaji haramu wanatumia fursa ya hali ya ukosefu wa utulivu ambayo imetawala nchini Libya tangu kuanguka kwa utawala wa dikteta wa zamani, Muammar Gaddafi, mwaka wa 2011. Nchi hiyo, iliyogawanyika kati ya mamlaka hasimu mashariki na magharibi, iko karibu kilomita 300 kutoka pwani ya Italia na imekuwa kitovu cha makumi ya maelfu ya wahamiaji haramu.